Апелациониот суд во Скопје донесе правосилна пресуда со која делумно ја уважи жалбата на Зијадин Села и го зголеми надоместот што државата треба да му го исплати за нематеријалната штета предизвикана од нападот во Собранието на 27 април 2017 година.
Со судската одлука, државата е задолжена да му исплати вкупно 7,8 милиони денари, односно околу 127.000 евра, за повреда на неговите лични права, телесното и душевното здравје.
Апелација го зголеми претходно досудениот надомест
Апелациониот суд ја преиначи пресудата на Основниот граѓански суд Скопје, кој претходно на Села му досуди надомест од 5,5 милиони денари.
Второстепениот суд оценил дека првостепениот суд не ја проценил целосно сериозноста на повредите и не ги зел предвид сите околности што влијаат врз утврдувањето правичен надомест.
Според образложението, претходно утврдениот износ не обезбедувал реално обесштетување и не ја отсликувал тежината на последиците што Села ги претрпел по нападот.
Утврдени надоместоци по повеќе основи
Од вкупниот досуден износ, 1,5 милиони денари се определени за претрпени физички болки, 900.000 денари за претрпен страв и три милиони денари за душевни болки поради намалена општа животна активност.
Дополнително, определени се по 600.000 денари за душевни болки поради нагрденост, како и за повреда на личното достоинство, честа и угледот.
На утврдениот износ ќе се пресметува и законска казнена камата, почнувајќи од 1 јуни 2023 година до целосната исплата.
Одбиено барањето за повисока отштета
Апелациониот суд ја одбил како неоснована жалбата на Државното правобранителство, со која било побарано укинување на пресудата и повторно водење на постапката.
Жалбата на Села била делумно прифатена, но судот го одбил неговото барање за дополнителен надомест над утврдените 7,8 милиони денари. Во тужбата тој побарувал вкупно 61 милион денари.
Во пресудата се наведува дека Села бил тешко повреден за време на нападот во Собранието на 27 април 2017 година, по што бил пренесен на болничко лекување.