Основното јавно обвинителство во Кавадарци поднесе кривична пријава против 28-годишен жител на Неготино осомничен за кривично дело демнење. Судот во Неготино, по предлог на обвинителот, одреди мерка притвор за осомничениот.
Според информациите од Јавниот обвинител, осомничениот од 12 септември 2024 до 25 февруари 2025 година преку Вајбер и Фејсбук испраќал текстуални пораки, линкови и фотографии со заканувачка содржина до градоначалникот на Неготино, настојувајќи да воспостави несакан контакт со него. Осомничениот се обидувал да го принуди градоначалникот да издејствува повлекување на кривичната постапка против него.
Иако кон осомничениот веќе се води претходна кривична постапка за присилба и изречени се мерки на претпазливост, како забрана за комуникација со градоначалникот, тој продолжил со своето незаконско дејствување. Тоа предизвикало чувство на несигурност, страв и вознемиреност кај оштетениот и неговото семејство.
Јавниот обвинител поради опасноста од бегство и можноста за повторување на делото, предложил притвор, што судот го прифатил.
Мерката притвор останува на сила додека се води понатамошната истрага.
Извор: Миа