Арон Орбан, помладиот брат на поранешниот унгарски премиер Виктор Орбан, е меѓу лицата приведени во утринската полициска акција поради сомнение за криумчарење мигранти, објави унгарскиот портал „Контрол“.
Како што наведува „Контрол“, Националната канцеларија за враќање и заштита на имотот (NVVH) и Националното истражно биро (NNI) во понеделникот наутро спровеле заедничка акција во Будимпешта и на повеќе локации во областа Пешта.
Според официјалното соопштение, во две паралелни кривични постапки биле уапсени повеќе лица, а кај нив биле извршени и претреси. Полицијата не ги објавила имињата на уапсените, а властите најавиле дека деталите за истражните дејствија ќе ги соопштат во текот на попладневните часови.
Набргу по објавата на „Контрол“, унгарскиот премиер Петер Маѓар на Фејсбук напиша дека, според информациите објавени во медиумите, Арон Орбан бил приведен под сомнение за криумчарење мигранти. Тој додаде дека NVVH и NNI ја продолжуваат истрагата.
Порталот „Телекс“ објави дека специјалната полициска единица ТЕК во понеделникот наутро излегла на имот поврзан со Арон Орбан. Од NVVH за овој портал потврдиле дека во предметот што се однесува и на братот на Орбан биле преземени нови истражни дејствија.
Според „Контрол“, NVVH била меѓу првите институции што ја презеле истрагата за визната афера во која се споменува името на Арон Орбан.
Претходно беше објавено дека неговата компанија запишувала виетнамски државјани на дводневен курс за прва помош на Универзитетот во Печ, што можело да им го олесни добивањето шенген-виза. Според истите медиумски написи, Орбан интервенирал и кај премиерскиот комесар за барањата за визи да бидат побрзо обработени.
Во истата афера, обвинителството во април уапсило двајца негови соработници, додека Арон Орбан тогаш не бил меѓу осомничените. Во септември NVVH ја презела истрагата од обвинителството.