Во Собранието денеска ќе се одржи првата седница на Анкетната комисија за случајот во Универзитетската клиника за радиотерапија и онкологија.
Единствена точка на дневниот ред е Предлог деловникот за работа на Комисијата.
Претседателката на Анкетната комисија Рашела Мизрахи од ВМРО-ДПМНЕ вчера во изјава за медиумите информираше дека согласно одлуката, комисијата ќе биде надлежна за утврдување на хронологијата на настаните и околностите во Универзитетската клиника за радиотерапија и онкологија, дали со скандалот се загрозени основите човекови права на пациентите кои се лекувале, политичката одговорност, како и изготвување заклучоци и препораки кои ќе имаат за цел да поведат постапка за утврдување на одговорност на носителите на јавните функции и спречување понатамошна злоупотреба, но и системски подобрувања на дефектите во оваа Клиника и целокупниот здравствен систем.
Доколку Анкетната комисија одлучи, како што кажа таа, на разговор ќе бидат повикани сите релевантни институци и функционери.
„Ја известуваме македонската јавност дека во текот на вчерашниот ден беше изгласана Одлука за избор на членови и заменици членови на Комисијата, а денес предмалку, официјално од страна на Генералниот секретар се назначени и собраниските соработници и службеници кои ќе бидат дел од оваа Анкетна комисија, со што целосно се исполнија условите за почеток со работа на оваа Анкетна комисија.
За таа цел, како претседател на Анкетна комисија ја информирам јавноста, но и медиумите, дека првата седница на оваа Комисија ќе биде закажана за утрешниот ден.
На крајот, сакам јавно од оваа говорница јасно и гласно да порачам дека јас како претседател на анкетната комисија ќе ги заложам сите мои знаења, умеење, труд и со сите останати колеги од комисијата како и 7-мата сила, Вас новинарите, ќе ја извадиме вистината на видело, каква и таа да е“ – вели Мизрахи.
Анкетната комисија е формирана со одлука на пленумот откако во јавноста беа објавени информации за злоупотреба на терапијата за пациенти болни од рак, за што истрага отвори и Јавното обвинителство.
На почетокот на септември беше извршен претрес на Клиниката за онкологија и во два приватни стана од каде беа одземени компјутери и документација по наводите во новинарски текстови за злоупотреба на лекови наменети за пациенти болни од рак.
Премиерот Димитар Ковачевски тогаш во изјава за медиумите рече дека ќе бидат санкционирани сите оние кои го прекршиле законот, но, апелираше да не се напаѓаат сите здравствени работници.
– Ова е првпат да биде спроведена една ваква обемна акција за идентификување на можни сторители на вакви дела. Би сакал да повикам да не се прави сензационализација и напад на сите доктори и медицински сестри во државата, бидејќи најголемиот број од медицинскиот персонал кој работи во нашата држава, се извонредни луѓе, кадри, што се грижат за здравјето на нашето население, изјави Ковачевски.
Пациенти болни од рак секој понеделник протестираат барајќи случајот да се истражи докрај.