Рускиот претседател Владимир Путин во последен момент одлучи да замине во Мариупол, украинскиот град уништен со бомбардирање, соопшти денеска Кремљ, додека украинските власти ја осудија посетата на рускиот лидер кого го нарекоа „меѓународен злосторник“.
„Сето тоа беше многу спонтано“, рече портпаролот на Кремљ, Дмитриј Песков.
Тој додаде дека не била планирана ниту обиколка на градот, ниту посетата на локалниот музички театар, ниту средбата со жителите на овој пристанишен град.
„Меѓународниот злосторник Путин ноќеска го посети окупираниот град Мариупол, веројатно за да не го види градот убиен од неговото ‘ослободување’ во текот на денот“, соопштија градските власти на Telegram.
Како што беше најавено претходно утринава од Кремљ, Путин со хеликоптер отпатува за Мариупол и го обиколи градот со автомобил, кој сам го возел.
Путин разговарал со жителите на Мариупол и му бил презентиран извештај за работите на обновата на овој уништен пристанишен град на Азовското Море.
Тој вчера беше во ненадејна посета на Крим по повод 9-годишнината од анексијата на полуостровот, кој Русија го анектираше во 2014 година откако жителите во огромно мнозинство на референдум се изјаснија за приклучување кон Русија.