– Според првичните информации, зголемениот број случаи доаѓаат од два познати кластери. Првиот кластер е од свадба, а вториот е повеќечлено семејство кое исто така било на мала семејна прослава. Она што загрижува и со што се соочиле здравствените работници е што некои од ковид позитивните пациенти не давале точни податоци и информации за контакти, како би можело да се спречи создавање на кластери околу двата постоечки, информираат од Министерството за здравство.
Министерството за здравство апелира граѓаните да соработуваат со епидемиолозите, бидејќи одбивањето на соработка од страна на пациентите прави потешкотии во спроведувањето на епидемиолошките анкети, а тоа може да доведе до голем број заразени. Комисијата за заразни болести ја следи епидемиолошката состојба во Тетово и е во комуникација со локалниот центар за јавно здравје каде се анализираат сите овие случаи.
Засега радува фактот што од 65 активни случаи во Тетово, само 12 се со симптоми и нема хоспитализирани во ковид центарот во КБ Тетово. Досега не е детектиран делта сој на СарсКов2, а кај лицата кај кои беше секвенциониран бразилскиот сој се ковид позитивни од јуни, велат од Министерството за здравство.
Министерството за здравство апелира до граѓаните и покрај мирната епидемилошка состојба во земјава, секој до нас да биде исклучително внимателен и да ги почитува протоколите и мерките за заштита на здравјето. Одржување лична хигиена на раце, држењето дистанца, носење маска е нешто што треба да биде лична одговорност на секого од нас. Апелираме дека мерките може да се променат и да се воведат рестрикции ако епидемиолошката состојба го наложи тоа.
Министерството за здравство укажува на важноста на вакцинацијата против ковид-19, која значи побрзо создавање колективен имунитет, а тоа е клучно да се победи ковид пандемијата.