Соединетите Американски Држави ги повлекоа своите последни воени трупи од базите во Ирак, завршувајќи го долгогодишното присуство во оваа земја. Истовремено, властите во Техеран го примија официјалниот одговор од Вашингтон во врска со предлогот за ставање крај на воениот конфликт кој трае повеќе од седум месеци.
Иран минатата недела понуди план според кој американската страна треба да ја укине поморската блокада врз иранските пристаништа. За возврат, официјален Техеран се обврза дека во рок од седум дена повторно ќе го отвори стратешкиот Ормутски теснец за непречен меѓународен сообраќај.
Американскиот претседател Доналд Трамп претходно изјави дека го одбил ваквиот предлог, но иранскиот министер за надворешни работи Абас Аракчи соопшти дека не примиле формално одбивање. Катарските посредници му го доставиле американскиот одговор на Аракчи за време на неговото слетување во Доха, при враќањето од Генералното собрание на ОН во Њујорк.
Неименуван дипломатски претставник потврди за агенцијата Ројтерс дека завојуваните страни начелно се согласуваат околу потребните чекори, но остануваат несогласувањата околу нивниот точен редослед. Иран бара цврсти гаранции за контрола врз теснецот, преку кој се одвиваше петтина од глобалниот транспорт на нафта пред почетокот на војната.
Состојбата во Ормутскиот теснец продолжува да биде крајно напната, а Британската агенција за поморски трговски операции пријави дека неодамна два брода биле погодени од ракетни проектири. Превозниците наплаќаат екстремно високи такси поради постојаниот безбедносен ризик, што предизвикува сериозни нарушувања во глобалниот енергетски пазар.
Повлекувањето на американските сили од Ирак претставува реализација на планот од 2024 година, а проиранските сили во регионот го прославија овој потег како сопствена геополитичка победа. Во текот на воените операции во Ирак од 2003 година загинаа 4.500 американски војници и над 200.000 ирачки цивили.
„историска победа за групите на ирачкиот исламски отпор и чесните Ирачани и пораз за американскиот проект“, вели Абу Моџтаба ал-Џасири.
Аналитичарите сметаат дека заминувањето на странските трупи отвора простор за значително зголемување на влијанието на Техеран врз багдадските институции и безбедносните политики.
„Овие групи би можеле да се обидат да ја прошират својата улога во обликувањето на државните политики и да го консолидираат своето присуство во клучните институции“, вели Ахмед Јунис.
Конфликтот создава силен притисок и врз американската внатрешна политика, особено поради растот на цените на горивата пред претстојните конгресни избори. Иранската револуционерна гарда дури упати и директен апел до гласачите во САД преку опширен документ.
„Отстранете ги од власт злите, измамнички и насилни политичари одговорни за моменталната состојба на Америка“, вели Иранската револуционерна гарда.
Од друга страна, Трамп останува на ставот дека воениот притисок дава резултати и дека другата страна наскоро ќе мора да попушти.
„Не знам дали ќе се откаже сега, но ќе се откаже“, вели Доналд Трамп.