Од Министерството за труд и социјална политика (МТСП) денеска соопштија дека двајцата соговорници разговарале за приоритетите на двете земји, особено по предизвиците што ги наметна пандемијата со Ковид-19, но и за продлабочување на меѓусебната соработка.
– Министерката Шахпаска се заблагодари за поддршката што ја добиваме од Словенија и ја истакна вербата и очекувањето дека Република Словенија за време на претседателствувањето со Европската Унија уште повеќе ќе придонесе за конечно придвижување на Македонија во нејзиниот интегративен процес и поскоро одржување на првата меѓу владина конференција, наведуваат од МТСП.
Словенечкиот министер Циглер Краљ оцени дека после пандемијата сите држави и во ЕУ и во Западен Балкан мора да се фокусираат на политики за младите кои ќе значат создавање услови за нивен побрз напредок и развој.
Министерката Шахпаска информираше дека Македонија креира и имплементира системски политики и решенија со цел да им обезбеди услови на младите да останат во државата и тука да ја градат својата иднина.
Таа додаде дека Министерството за труд и социјална политика работи на повеќе нови законски решенија, како што е и Законот за работни односи, во кој ќе бидат имплементирани работата од дома, работата од далечина, флексибилното работно време со цел да излезе во пресрет на потребите на денешнината. За дел од нив, додаде Шахпаска, како што законот за вработување и осигурување во случај на невработеност го анализираме и словенечкиот модел.
Шахпаска го покани министерот Циглер Краљ, во наредниот период, да ја посети С. Македонија, подетално да се запознае со социјалната реформа, но и да се разгледаат можностите за меѓусебна соработка.