Шведска воведува затвори за малолетници: И 13-годишници ќе издржуваат казна за за тешки злосторства

Шведската влада предлага воведување специјални затвори за малолетници, со цел да се промени начинот на кој државата се справува со младите сторители на тешки кривични дела. Реформата треба да стапи на сила на 1 јули годинава.

– Младите луѓе кои извршуваат кривични дела треба да добијат многу подобра грижа отколку што е случајот денес – рече министерот за правда Гунар Штромер.

Според предлогот, децата и младите ќе ги издржуваат казните во специјални затвори наместо во досегашните институции за затворено згрижување. Веќе ова лето, дури и 13-годишници кои извршиле најтешки кривични дела, како убиства или сериозни дела со експлозиви, би можеле да бидат испратени во затвор.

Според „Сведен Хералд“, првите три институции за млади на возраст од 13 до 17 години ќе бидат затворите Кумла, Розерсберг и Сагсјон.

Малолетниците ќе бидат сместени во посебни одделенија, физички одвоени од возрасните затвореници, со сопствена спортска сала, терени за вежбање и медицински оддел. Активностите ќе се организираат така што децата под 15 години нема да се мешаат со постарите, а во исклучителни случаи таму ќе може да се сместат лица до 20 години.

Затворот Розерсберг, северно од Стокхолм, веќе подготвува четири мали одделенија со по шест места и поголем број персонал по смена. Ќелиите од осум квадратни метри се опремени со кревет, биро, полица за книги и телевизор зад плексиглас, додека тоалетот и мијалникот се во посебен простор. Младите нема да делат ќелии и ќе можат да донесат фотографии, цртежи, книги и ЦД-а.

– Разговаравме и за плишените играчки и решивме да ги одобриме – рече Пија Вилборг, раководител на подпроектот за одделенија за млади во Розерсберг.

Малолетниците ќе бидат заклучени во ќелиите од околу 20.00 до 7.00 часот, со копче за аларм за итни случаи. Образованието ќе биде задолжително и ќе се одвива во мали одделенија, а секое дете ќе има индивидуален план во соработка со социјалната служба и родителите.

Тие ќе имаат право на еден час дневно на отворено, а во слободното време ќе можат да спортуваат, да се занимаваат со музика или сликање. Видео игрите ќе бидат дозволени во одредени периоди и без насилни наслови, додека мобилните телефони, таблетите и социјалните мрежи ќе бидат забранети.

Реформата следува по студии кои покажале дека девет од десет млади членови на банди повторно се враќаат во криминал по престој во домовите на SiS.