Дабовото гранче како знак за живот, здравје и долговечност
На Бадник, вечерта пред Божиќ, православните христијани во своите домови внесуваат бадниково гранче, со кое го украсуваат просторот и го одбележуваат празникот. Станува збор за дабово гранче, кое има посебно симболично значење и длабока врска со народната и христијанската традиција.
Обичајот на украсување на домот со бадниково гранче е забележан уште од 4 век. Бадниковото гранче е еден од најпрепознатливите симболи на Бадник и се поврзува со здравјето, животот и вечната среќа. Во народното верување, тоа претставува благослов за домот и за сите што живеат во него.
Како бадниково гранче се користи токму даб, бидејќи уште од дамнина дабовите дрвја се сметале за најцврсти, најиздржливи и најдолговечни. Во народната традиција постои верување дека со дабово дрво праведниот Јосиф запалил оган за да ги загрее новородениот Исус и неговата мајка Марија.
Народните верувања поврзани со бадниковото гранче
Бадниковото гранче често се нарекува и дрво на животот. Тоа симболично се поврзува со дрвото на животот од рајот, кое носи вечност. Како што дабовото дрво долго го чува жарот, така и оној што го внесува гранчето во својот дом верува дека ќе има долг живот и духовна вечност.
Според народните верувања, дабот е симбол на здравје, сила и истрајност. Со внесувањето на дабовите гранчиња во домот, се верува дека овие особини ќе се пренесат на членовите на семејството. На тој начин, бадниковото гранче не е само украс, туку и симбол на надеж, заштита и благосостојба за целата година.