Притвор побаран за двајца директори од Онкологија – Обвинителството стравува од бегство
Основното јавно обвинителство Скопје, како дел од постапката во случајот „Онкологија“, вчера до Основниот кривичен суд Скопје поднесе обвиненија и предлог за притвор за двајца високи раководители на Клиниката за радиотерапија и онкологија. Се работи за медицинскиот директор Нино Васев и организацискиот директор Нехат Нухи.
Обвинителството ги товари за повеќе кривични дела за кои се предвидени високи затворски казни. Истовремено посочува дека нивните дејствија нанеле значителна имотна штета на државниот Буџет.
„Постои основан страв дека обвинетите можат да се дадат во бегство поради тежината на делата и сериозноста на последиците“, наведуваат од Обвинителството.
Претпазливост и за тројца лекари – одземени патни исправи
Освен предлогот за притвор Васев и Нухи, Обвинителството предложи и мерки на претпазливост за тројца лекари – онколози, кои исто така се обвинети во предметот. За нив се бара привремено одземање на патни исправи или забрана за нивно издавање, со цел да се спречи евентуално напуштање на државата.
„Со поднесување на обвиненијата се подигна и степенот на сомнение и веројатноста за нивна кривично-правна одговорност“, стои во соопштението.
Обвинителството смета дека овие мерки се неопходни за непречено водење на постапката и обезбедување на обвинетите лица.
Извор: Скопје1