Американскиот претседател Доналд Трамп го отфрлил најновиот предлог на Иран за прекин на огнот, оценувајќи дека не е доволен. Тој истовремено ја остави отворена можноста САД да ги обноват воздушните напади врз Иран по изборите закажани за 3 ноември.
Во интервју за списанието „Тајм“, Трамп изјави дека повеќе нема да прифаќа предлози од Техеран кои, како што рече, „не би ги одобрил ниту пред една година“.
Американскиот претседател не ја исклучи можноста за продолжување на бомбардирањето на Иран по изборите, но одби да открие детали за евентуалните идни воени операции.
„Не можам да ви го кажам тоа затоа што, видете, всушност ме прашувате каде ќе бомбардираме“, им изјави Трамп на новинарите.
Во меѓувреме, судирите меѓу Хутите, кои ја уживаат поддршката на Иран, и владините сили во Јемен предизвикаа загриженост дека бунтовниците би можеле да напредуваат кон Таиз, град во југозападниот дел на земјата.
Во интервјуто Трамп ги коментираше и извештаите според кои израелскиот премиер Бенјамин Нетанјаху однапред бил предупреден за нападот што „Хамас“ го подготвувал врз Израел на 7 октомври 2023 година.
Израелски весник објави дека претседателот на Обединетите Арапски Емирати лично го предупредил Нетанјаху за подготовките за голема офанзива на „Хамас“ само неколку дена пред нападот. Нетанјаху категорично ги отфрли овие информации.
Трамп изјави дека за тврдењата дознал дури на денот кога било направено интервјуто за „Тајм“, односно на 28 септември.
„Не можам да замислам такво нешто“, рече Трамп.
Тој додаде дека доколку Нетанјаху навистина бил однапред предупреден, израелскиот премиер, според него, „сигурно ќе преземел нешто“ или барем „ќе наредел луѓето да бидат предупредени“.
Во истото интервју, Трамп не даде директен одговор на прашањето дали смета дека Нетанјаху треба повторно да биде избран на изборите во Израел, кои треба да се одржат подоцна овој месец.
„Повеќе не се занимавам со таква политика“, изјави американскиот претседател.
Трамп истовремено нагласи дека Нетанјаху не треба да биде потценет.
„Луѓето многу, многу пати го отпишуваа Биби, исто како што многу пати ме отпишуваа и мене“, рече Трамп.
За политичкиот противник на Нетанјаху, Гади Ајзенкот, американскиот претседател изјави: „Не слушам лоши работи за него“.