Американскиот претседател Доналд Трамп најави дека ќе ги укине царините за ирското виски што се увезува во Соединетите Американски Држави. Соопштението го даде на крајот од својата дводневна посета на Ирска, за време на доделувањето на наградите на турнирот „Ирски опен“.
Публиката со аплауз ја поздрави најавата на Трамп, дадена на 18-тата дупка во голф-ресортот Дунбег, во округот Клер. Американскиот претседател, кој носеше бела капа со натпис „САД“, во неделата му го врачи трофејот на победникот на турнирот, Шејн Лоури.
Трамп изјави дека за царините разговарал со ирскиот премиер Мајкл Мартин и со Лоури.
„Ме прашуваат: ‘Дали ќе ми направите услуга? Неправедно е тоа што се случува. Можете ли некако да ги отстраните царините за ирското виски?’ И јас реков дека, во име на Соединетите Американски Држави, ќе ги отстранам царините за ирското виски“, рече Трамп.
Вискито произведено во Ирска при увозот во САД во моментов подлежи на царина од 10 отсто. Вискито произведено во Северна Ирска или во друг дел од Обединетото Кралство не подлежи на царински давачки.
Лоури по турнирот на прес-конференција се пошегува дека ирските производители на виски треба да му испратат чек.
„Ирските дестилерии треба наскоро да ми напишат чек. Тоа би требало да им вреди нешто. Синоќа бев на голема вечера и таму разговаравме, но тој не ми кажа дека ги променил плановите поради мене“, изјави Лоури.
Ирското здружение за виски соопшти дека „од срце ја поздравува“ најавата на американскиот претседател.
„Ќе продолжиме да работиме со нашите европски и американски колеги за да обезбедиме враќање на нула царински давачки за извоз на сите пијалаци“, се додава во реакцијата на здружението.
Трамп со хеликоптерот „Марин уан“ треба да биде пренесен од голф-теренот до аеродромот Шенон, од каде што ќе ја напушти Ирска.