Трамп планира средба со Путин и Зеленски ако разговорот со рускиот претседател биде успешен

Американскиот претседател ќе одржи средба со Путин и Зеленски доколку преговорите во Алјаска донесат позитивен исход.

Средба со Путин и Зеленски е планот на американскиот претседател Доналд Трамп, ако состанокот со Владимир Путин заврши успешно.

Трамп изјави дека, доколку првиот разговор со рускиот лидер помине добро, ќе побара втора средба, овојпат со украинскиот претседател Володимир Зеленски.

„Ако првата помине добро, многу брзо ќе имаме втора“, рече Трамп. „Би сакал тоа да се случи речиси веднаш. Средба меѓу претседателот Путин, претседателот Зеленски и мене би била добредојдена“, додаде тој.

Првиот состанок меѓу Трамп и Путин е закажан во американската воена база во Енкориџ, Алјаска.

Трамп предупреди дека ќе има „многу тешки последици“ за Русија доколку Путин не се согласи да ја заврши војната во Украина. „Да, ќе има“, нагласи тој, без да прецизира мерки.

Американскиот претседател порано истакна дека, ако нема напредок, ќе воведе строги економски санкции. Тој изрази желба за трилатерален самит меѓу Русија, Украина и САД.

Пред оваа најава, Трамп учествуваше во виртуелни консултации со Зеленски, како и со лидерите на неколку европски земји, ЕУ и НАТО.