Без барања за поскапување од ЕСМ, МЕПСО и МЕМО – цената на електричната енергија под контрола
Цената на струјата за домаќинствата нема да се зголемува. Генералниот директор на АД ЕСМ, Лазо Узунчев, најави дека компанијата нема да поднесе барање за корекција на цената по која ѝ продава електрична енергија на универзалниот снабдувач ЕВН Хоум.
Производната цена на струјата значително намалена
Узунчев информираше дека во првиот квартал од 2025 година производната цена на електричната енергија е намалена на 98,9 евра за мегават час. Особено е значајно што цената на струјата произведена во РЕК Битола падна од ланските 128 евра на само 96 евра за мегават час.
Иако компанијата не ги користела евтините хидропотенцијали поради нивното исцрпување од претходното раководство, успеала да ја намали цената за 7%.
Хидропотенцијалите повторно на безбедно ниво
– На 1 јануари имавме само 6% хидропотенцијал. Денеска тој е 48%, а нашата цел е до 1 октомври да достигнеме минимум 50%, изјави Узунчев. Тоа ќе овозможи стабилно и поевтино производство на електрична енергија во зимскиот период.
Планот за профит без државни субвенции
Во првиот квартал од 2025 година АД ЕСМ реализирала 35% од планираното производство. Очекувањата се дека до крајот на годината планот ќе биде надминат, што ќе овозможи завршување со профит, дури и минимален.
Компанијата во моментов ѝ продава струја на ЕВН Хоум по цена од 62 евра за мегават час, што е под пазарната и затоа не добива субвенции од Владата.
И МЕПСО и МЕМО не бараат зголемување
Покрај ЕСМ, и директорите на МЕПСО – Бурим Љатифи и МЕМО – Зоран Ѓорѓиевски, потврдија дека нивните компании нема да бараат поскапување на струјата.
Извор: Курир