Уапсени се тројца македонски државјани кои како борци на терористичката организација „Исламска држава“ (ИСИС) активно учествувале во војната во Сирија, соопшти денеска Министерството за внатрешни работи. Како што се наведува во соопштението, тројцата уапсени членови на ИСИС од Македонија „во изминатиот период биле предмет на интерес на безбедносните служби“ и биле уапсени во рамките на глобалната борба против тероризмот.

Двајца се уапсени во Македонија, а еден во Франција, според македонската потерница, во соработка со МУП и Агенцијата за национална безбедност (АНБ) и француските власти.

Според полицијата, тие тројца македонски државјани О.С.(28), Р.С.(33) и М.Г.(26) им се приклучиле на вооружените формации на ИСИС во текот на 2014 година на територијата на Сирија и активно учествувале во воените операции.

Постапувајќи по наредби за претрес на куќи и други простории издадени од судија на претходна постапка, МУП денеска во утринските часови изврши претрес на две локации во Скопје кај О.С. и Р.С., каде е пронајдено и одземено оружје, муниција, мобилни телефони и други електронски уреди кои може да содржат дополнителни докази за стореното кривично дело“, изјави портпаролот на МУП на Македонија.

Како што истакна, согласно обезбедените докази, полицискиот сектор за борба против тероризам, насилен екстремизам и радикализам, до Обвинителството за организиран криминал на Македонија поднесе кривична пријава против горенаведените лица за сторено кривично дело „служење во непријателска војска“, предвидено во член 322 од Кривичниот законик.

Според тој член од Кодексот, за учество „во непријателската војска“ предвидена е затворска казна од најмалку три години, а за регрутирање граѓани на Македонија затворска казна од најмалку пет години.