Уставниот суд на денешната седница укина дел од законска одредба од Законот за социјалната заштита, со која граѓаните беа условувани со конкретна возраст за да остварат соодветно право. Досегашното законско решение наложуваше лицето задолжително да биде невработено, да не користи пензија и да има навршено најмалку 60 години возраст доколку станува збор за жена, односно 62 години возраст за маж, услов кој судиите го оценија како неодржлив и го ставија надвор од правна сила.
Во рамки на одржаната 24. седница, Уставниот суд одлучи да поведе две нови постапки за преиспитување на уставноста и законитоста на други правни акти. Првата постапка се однесува на член 34-в став 9 од Законот за бесплатна правна помош, која беше иницирана од Оливер Давидовски. Втората поведена постапка опфаќа повеќе подзаконски акти донесени од страна на Агенцијата за супервизија на осигурување, а кои се директно поврзани со правилата за вршење на осигурително-брокерски работи.
Од друга страна, уставните судии оценија дека нема основа за поведување постапка за оценување на уставноста на член 157 став 8 од Кривичниот законик, како и за одредбите од член 461 ставови 2, 3 и 4 од Законот за парничната постапка. За овие предмети Судот констатираше дека оспорените членови се во согласност со највисокиот правен акт на државата.
На дневен ред се најдоа и одредби од Законот за заштита на децата. Поради недобиено потребно мнозинство гласови меѓу судиите, не беше донесена конечна одлука за иницијативата со која се бараше поведување постапка за одредени делови од член 36 од тој закон, додека доставената иницијатива за член 38 став 3 од истиот закон беше целосно отфрлена. Дополнително, Уставниот суд ги отфрли како неосновани и иницијативите поднесени за оценување на уставноста и законитоста на Правилникот за педагошка евиденција и документација во средните училишта.