Војската на Украина објави дека ослободила вкупно 130 квадратни километри територија окупирана од Русија во јужна Украина откако започна контраофанзива пред околу три недели.
Во текот на изминатата недела вратени се дополнителни 17 квадратни километри од областа Запорожје под руска окупација, објави денеска на Телеграм заменик-министерката за одбрана Хана Малиар.
Украина објави и помали успеси на источниот фронт.
Маилар рече дека и покрај жестокиот отпор на Русите, украинската армија напреднала еден до два километри во неколку правци во текот на претходната недела.
Армијата исто така ги одби руските контранапади на неколку точки на линијата на фронтот, вклучително и оние кај Бахмут, Лиман и Авдивка, каде што, наводно, во моментов се водат особено жестоки борби. Во изминатата недела во овие области се водеа повеќе од 250 битки, рече Малиар.
Руското Министерство за одбрана вчера извести за повеќе од 20 украински напади во еден ден на југот и на истокот на земјата. Информациите кои доаѓаат од воената зона не можат да бидат проверени од независни извори.