Две украински беспилотни летала влегле во воздушниот простор на Латвија, земја-членка на НАТО, и се урнале, соопшти летонската војска. Латвискиот министер за одбрана Андрис Спрудс за националната телевизија LSM изјавил дека беспилотните летала најверојатно биле лансирани од Украина кон цели во Русија. Тој додал дека на местото биле испратени воени авиони од мултинационалната мисија на НАТО за надзор на воздушниот простор на Балтикот.
Во четврток наутро биле оштетени четири празни резервоари за нафта во складиште во Резекне, на околу 40 километри од руската граница. Полицијата и пожарникарите соопштиле дека на местото биле пронајдени можни остатоци од едно од беспилотните летала. Пожарникарите изгаснале пожар со површина од околу 30 квадратни метри во еден од резервоарите.
Латвиските власти во 4:09 часот по локално време издале предупредување за беспилотни летала до жителите долж руската граница, повикувајќи ги да останат во своите домови. Локалните власти соопштиле дека сите училишта во Резекне ќе бидат затворени во четврток.
Неколку залутани украински беспилотни летала кон крајот на март претходно ги погодија Латвија и соседните членки на НАТО, Естонија и Литванија. Едно од нив удрило во оџак на локална електрана, додека друго паднало во замрзнато езеро и експлодирало.
Се верува дека украинските беспилотни летала биле лансирани со цел да нападнат воени цели во Русија. Балтичките држави претходно соопштија дека никогаш не дозволиле нивните територии и воздушен простор да се користат за напади со беспилотни летала врз цели во Русија.