Кинескиот хуманоиден робот Tiangong Ultra постигна ново најдобро време на 100 метри, откако патеката ја мина за 8,86 секунди на Светските игри за хуманоидни роботи во Пекинг. Со овој резултат роботот го подобри сопственото време од 9,39 секунди, поставено на отворањето на натпреварувањето.
Новото време е за повеќе од седум десетинки пократко од светскиот рекорд на 100 метри во машка конкуренција. Рекордот од 9,58 секунди го постави јамајканскиот спринтер Јусеин Болт во 2009 година.
Tiangong Ultra е развиен од Центарот за иновации на хуманоидни роботи во Пекинг, а новиот резултат го постигна во полуфиналето во категоријата големи роботи.
Токму брзото подобрување на перформансите на роботот е една од главните атракции на второто издание на Светските игри за хуманоидни роботи во Пекинг. На настанот учествуваат повеќе од 2.000 роботи од 666 тима, кои се натпреваруваат во 51 дисциплина.
Натпреварувањата опфаќаат различни категории, меѓу кои фудбал, танц и натпревари поврзани со индустриски задачи.
Од Центарот за иновации на хуманоидни роботи во Пекинг претходно во вторникот соопштија дека роботите Tiangong Ultra веќе поставиле четири рекорди што ги надминуваат најдобрите човечки резултати во соодветните дисциплини.
Покрај времето од 8,86 секунди на 100 метри, роботите поставиле и време од 38,15 секунди на 400 метри. На 1.500 метри постигнале време од две минути и 21,64 секунди, додека во скок во височина достигнале 2,88 метри.
Кина ги идентификуваше хуманоидните роботи како стратешки важна индустрија за раст. Компаниите и креаторите на политики настојуваат напредокот во вештачката интелигенција, моторите и сензорите да се примени во производството, логистиката и услужните дејности.