Земјотресот што вечерва го погоди Скопје се случи за време на стендап настапот „Широк дијафазон“ на Сашко Коцев во Македонски народен театар, предизвикувајќи краткотрајна вознемиреност кај дел од публиката.
Дел од публиката се вознемири, Сашко Коцев ги насмеа оние кои сакаа да заминат
Во моментот на потресот, дел од присутните гледачи станале од своите места со намера да ја напуштат салата, додека други продолжиле да реагираат со смеа на случувањата на сцената, објави Скопје 1. Атмосферата накратко се сменила, но без поголеми инциденти.
Коцев ја задржа смиреноста
Комичарот подоцна изјави дека лично не го почувствувал земјотресот, но веднаш ја искористил ситуацијата за шега, со што успеал да ја задржи позитивната енергија меѓу присутните. Тој ги повикал оние што сакаат да ја напуштат салата тоа да го направат мирно и без турканици, со цел да не се создаде непотребна паника.
Епицентарот бил на косовска територија
Настанот завршил по десетина минути во целосно смирена атмосфера, без нарушување на безбедноста. Според Сеизмолошка опсерваторија при Природно-математичкиот факултет, земјотресот имал јачина од 4,6 степени според Рихтеровата скала, а епицентарот, спротивно на првичните информации, бил на косовска територија, во близина на границата со Македонија.