Дванаесет лица се повредени во драматичен инцидент во португалското летувалиште Албуфеира, откако 35-годишен возач со автомобил се залетал кон пешаци во една од најпознатите улици за ноќен живот во градот. Меѓу повредените има и двајца припадници на португалската полиција, додека 21-годишна девојка се здобила со тешки повреди.

Инцидентот се случил околу 3 часот наутро на улицата Руи Франциско Са Карнеиро, во делот познат како Оура Стрип.

Според португалската Национална републиканска гарда (GNR), автомобилот во еден момент ненадејно тргнал. Полицајците му наредиле на возачот да застане, но тој не го почитувал предупредувањето.

Наместо да запре, 35-годишникот го свртел автомобилот и продолжил да вози. Кога повторно бил запрен од полицијата, тој повторно не застанал, туку со возилото се упатил директно кон пешаците и полициската патрола.

Во налетот биле повредени повеќе лица. Полицајците испукале и неколку куршуми во воздух за да ги предупредат луѓето и да се обидат да го запрат возачот.

По инцидентот, возачот продолжил да бега. Со автомобилот се судрил со друго возило, по што излегол и се обидел да избега пеш. Полицијата успеала да го стигне и да го уапси.

Меѓу 12-те повредени има 10 португалски државјани, како и државјани на Полска и Шпанија. Двајца од повредените се припадници на полицијата.

Една 21-годишна Португалка е тешко повредена, додека останатите 11 лица се здобиле со полесни повреди и не се во животна опасност.

Возачот бил под дејство на алкохол. Алкотестот покажал 1,29 грама алкохол на литар крв, додека дозволената граница во Португалија е 0,5 грама на литар.

Против него се води постапка поради тешко насилство, опасно управување и возење под дејство на алкохол. Направени му се и токсиколошки анализи.

Снимките од местото на настанот покажуваат како автомобилот со вклучени фарови се движи кон пешаците, додека луѓето во паника се обидуваат да избегаат од патот.

Португалскиот министер за внатрешни работи Луис Невеш изрази солидарност со повредените и нивните семејства и им посака брзо закрепнување.

Градоначалникот на Албуфеира, Руи Кристина, изјави дека станува збор за изолиран инцидент и дека градот презема мерки за безбедноста во зоната со ноќни клубови. Тој додаде дека возачот насилно ги пробил поставените заштитни бариери и продолжил да вози по тротоарот.