Воен хеликоптер на меѓународните сили ЕУФОР се урна во местото Горице, во непосредна близина на Брчко во Босна и Херцеговина. Леталото при падот е целосно уништено. Според неофицијални информации објавени од локалните медиуми, во оваа тешка воздухопловна несреќа животот го загубиле три лица.
Од мисијата на ЕУФОР официјално потврдија дека нивно летало учествувало во воздухопловен инцидент за време на извршување редовни активности. Во првичното соопштение меѓународните сили не изнесоа конкретна потврда за настраданите лица, но нагласија дека инцидентот се случил на отворен терен.
„ЕУФОР може да потврди дека денеска, за време на рутинска операција во областа на Брчко, се случила несреќа во која се урнало едно од нашите летала“, соопштиле од меѓународните сили.
Во официјалниот извештај на ЕУФОР се потенцира дека при урнувањето на хеликоптерот нема настрадани или повредени цивили. Исто така, не е предизвикана штета врз цивилна инфраструктура, приватни имоти или возила на локалното население во околината на Горице.
„ЕУФОР спроведува целосна и темелна истрага за инцидентот и ќе објави повеќе информации кога ќе бидат утврдени фактите и кога ќе биде соодветно“, се наведува во соопштението.
Раководството на меѓународната воена мисија упати директен апел до граѓаните и јавноста да се воздржат од ширење непроверени дезинформации во врска со трагедијата и да се потпираат единствено на официјалните канали за комуникација.
Веднаш по падот, на местото на несреќата интервенирале полициски службеници од Дистриктот Брчко, противпожарни единици и екипи на службата за итна медицинска помош. Целиот реон околу падот на хеликоптерот е целосно блокиран и обезбеден со полициска лента, додека надлежните органи работат на утврдување на точните причини за несреќата.