Одлуката важи седум дена од денот на стапување во сила
Владата на денешната редовна 138 седница донесе одлука за постоење на кризна состојба во снабдувањето со електрична енергија на целата територија на државата. Кризата ќе важи во период од седум дена, сметано од денот на влегување во сила на одлуката.
Одлуката е донесена по предлог на Управувачкиот комитет за координација и управување со системот за управување со кризи.
Причина е неможноста за набавка на мазут
Како што беше информирано и во изминатите денови, прогласувањето на кризна состојба произлегува од неможноста за набавка на мазут. Овој енергенс е неопходен во дел од производството на електрична енергија.
Недостигот на мазут директно влијае врз стабилноста на производствениот процес.
Задолжителните резерви се отстапуваат без надомест
Задолжителните резерви на нафтен дериват ќе бидат отстапени без надоместок. АД ЕСМ ќе има обврска за трошењето на мазутот редовно да доставува извештаи до Владата и до Министерството за финансии.
Со оваа мерка институциите ќе го следат користењето на резервите и ефектите од донесената одлука.