ВМРО-ДПМНЕ обвинува дека Арсовска и Ковачевски се виновни за блокадите: Спремаат ли пат за бугарска фирма?

ВМРО-ДПМНЕ обвини дека премиерот Димитар Ковачевски и градоначалничката на Град Скопје, Данела Арсовска се виновни за блокадата на превозниците.

„Коалицијата Тачела составена од Ковачевски и Арсовска е виновна за блокадата на превозниците, спремаат ли пат за бугарска фирма да го земе превозот? Се користи ли ЈСП за коалициски комбинаторики?“, прашуваат од ВМРО-ДПМНЕ.

Во денешното соопштение на партијата се вели дека ЈСП е еден од стожерите на коалицијата на неврзаните (СДС – ДУИ – Левица).

„Данела Арсовска првин го постави Александар Стојковски за директор на ЈСП. Стојковски е кадар на СДС, што се потврдува и од фотографии на кои тој е сликан во централниот штаб. Стојковски потпишува договор за набавка на гориво вреден 27 милиони евра, и во тој договор го нема попустот од 6 денари, кој до сега бил пракса. Со непостоењето на попуст, буџетот на ЈСП е оштетен за 1.4 милиони евра. Пари кои се доволни за да го покријат долгот кој ова претпријатие го има кон приватните превозници. Веќе е создаден проблемот. Арсовска ги има приватните превозници на улица, а средства нема. Во меѓувреме распишува нов повик за избор на превозници, а долгот не го враќа“, велат од ВМРО-ДПМНЕ.

Од опозициската партија прашуваат дали зад хаосот во Скопје се крие режирано сценарио за бугарско фирма да го преземе превозот во Скопје.

„Скопјани се прашуваат дали зад хаосот кој го гледаме деновиве со блокирани улици, се крие режирано сценарио за бугарска фирма да го земе превозот во Скопје? Дали Арсовска свесно ги креираше проблемите? Дали 6-те денари кои до сега биле попуст, завршиле како провизија? Дали ЈСП е дел од пазарот за тајната коалиција Тачела? Што треба скопјани да трпат за Арсовска да може да владее?“, прашуваат од ВМРО-ДПМНЕ.