Сојузот на синдикатите на Македонија (ССМ) е под контрола на СДСМ и функционира како нивен партиски огранок, обвини ВМРО-ДПМНЕ во партиско соопштение. Партијата тврди дека Слободан Трендафилов ја узурпирал лидерската позиција во синдикатот со поддршка од СДСМ, а сега делува исклучиво по нивни инструкции.
Координација меѓу СДСМ и ССМ за создавање хаос
“Слободан Трендафилов е незаконски претседател на ССМ, кој ја узурпирал функцијата со помош на СДСМ. Денес, тој мора да спроведува сè што ќе му биде наредено од Бихаќка.” – стои во соопштението на ВМРО-ДПМНЕ.
Според партијата, координацијата меѓу СДСМ и ССМ е очигледна. Прво, СДСМ излегува со партиски соопштенија, потоа ССМ поднесува идентични барања, а на крајот СДСМ повторно ги поддржува истите иницијативи.
“Ова не е независен синдикат, туку партиски инструмент на СДСМ. Се користи за креирање забуна во јавноста и за блокирање на реформските процеси.”
ССМ е под контрола на СДСМ – признание од Лукаревска
ВМРО-ДПМНЕ нагласува дека планот на СДСМ и ССМ бил разобличен откако Сања Лукаревска призна дека редовно одржуваат заеднички состаноци и координации.
“Сите лаги на СДСМ излегоа на површина. Наместо да се залагаат за вистинските работнички права, нивната цел е создавање хаос и опструкции кон Владата.” – потенцираат од ВМРО-ДПМНЕ.
Партијата додава дека јавноста веќе гледа игра и координација меѓу СДСМ и ССМ, во која, според нив, ССМ и СДСМ настапуваат како едно тело со заедничка стратегија за напади врз Владата.
“Граѓаните не се наивни. Јасно е дека ова е обид да се креира вештачка криза, но нема да им помине.”