Падот на цените на нафтата и оптимизмот на инвеститорите ги турнаа берзанските индекси на највисоки нивоа
Американските берзански индекси минатата недела повторно забележаа раст и достигнаа нови рекордни вредности, поттикнати од вестите за можен договор меѓу САД и Иран и намалувањето на цените на нафтата на светските пазари.
Индексот Dow Jones порасна за 0,89 проценти и достигна 51.032 поени, S&P 500 зајакна за 1,4 проценти на 7.580 поени, додека Nasdaq забележа раст од 2,4 проценти и се искачи на 26.972 поени.
Нафтата поевтини по пораките од Трамп
Позитивното расположение на пазарите дојде откако се појавија информации дека Вашингтон и Техеран разговараат за продолжување на примирјето за дополнителни 60 дена, што придонесе за намалување на цените на енергенсите.
Американскиот претседател Доналд Трамп изјави дека Иран мора да се откаже од нуклеарното оружје и побара слободна пловидба низ Ормускиот теснец.
По неговата објава, американската нафта WTI поевтини за 1,73 проценти и се спушти на 87,36 долари за барел, додека цената на суровата нафта „Брент“ падна за 1,77 проценти, на 92,05 долари за барел.
Во текот на мај, WTI загуби околу 17 проценти од вредноста, а „Брент“ поевтини за 19 проценти.
Инфлацијата и ФЕД остануваат фактор на неизвесност
И покрај растот на берзите, дел од инвеститорите и натаму се внимателни поради инфлациските притисоци и можноста американската централна банка да ги зголеми каматните стапки до крајот на годината.
Дополнителна загриженост предизвикува и забавувањето на економскиот раст во САД. Според најновите проценки, американскиот бруто-домашен производ во првиот квартал пораснал за 1,6 проценти на годишно ниво.
Сепак, оптимизмот поврзан со развојот на вештачката интелигенција продолжува да го поддржува пазарот, а токму технолошките компании остануваат главен двигател на растот на Волстрит.