По објавено видео на социјалната мрежа ТикТок, полициските службеници идентификуваа и казнија возач кој управувал патничко возило по пешачко-велосипедска површина. На видеозаписот се гледаше како автомобил марка „сузуки“ со скопски регистарски ознаки се движи по велосипедската патека покрај улицата „Бутелска“ во Скопје.
Движењето на возилото се одвивало во правец од кружниот тек кон крстосницата со булеварот „Босна и Херцеговина“. Веднаш по сознанијата, Одделението за безбедност на патниот сообраќај при СВР Скопје презеде интензивни мерки за утврдување на идентитетот на лицето зад воланот.
По спроведените активности, утврдено е дека станува збор за четириесет и шестгодишниот Н.К. од Скопје. Тој бил повикан на службен разговор во полициска станица, каде што му била изречена соодветна прекршочна санкција за управување возило по несоодветна сообраќајна површина.
Министерството за внатрешни работи упати апел до сите учесници во сообраќајот строго да ги почитуваат сообраќајните правила и законските прописи со цел да не ја загрозуваат општата безбедност.