Кошаркарите на ТФТ стигнаа до својата втора победа во македонската Суперлига откако на домашен терен ја совладаа екипата на Штип со резултат 84:70. Овој дуел беше воведен натпревар од четвртото првенствено коло во домашниот шампионат.
Тимот предводен од тренерот Боро Смилковски ја контролираше играта и му го нанесе четвртиот последователен пораз на дебитантот во елитната конкуренција. Кај победничкиот состав четворица кошаркари забележаа двоцифрен поентерски ефект, при што најефикасен беше Вајт со постигнати 22 поени.
Значаен придонес во победата имаа и Сила со 13 поени, Николов кој постигна 12, како и Луис кој го заврши натпреварот со десет поени. Во редовите на штипскиот тим најефикасен играч на средбата беше Камерон Хамилтон со 27 поени, што сепак не беше доволно за избегнување нов пораз.