Недостатокот на течности не се манифестира само со чувство на жед
Високите температури го зголемуваат ризикот од дехидрација, а лекарите предупредуваат дека организмот не секогаш испраќа само еден јасен сигнал дека му недостигаат течности. Освен чувството на жед, дехидрацијата може да се манифестира и со замор, главоболка, вртоглавица, намалена концентрација и промени во расположението.
До дехидрација доаѓа кога телото губи повеќе течности отколку што внесува. Таквата состојба може да биде последица на засилено потење, подолг престој на сонце, покачена телесна температура, консумирање алкохол, но и интензивна физичка активност.
„Чувството на жед најчесто се јавува откако телото ќе изгуби околу два проценти од вкупните течности. Во летниот период, кога потењето е почесто поради високите температури, овој знак може да се појавува почесто од вообичаено“, советуваат лекарите.
„Не треба да се чека само појавата на жед за да се внесе вода, бидејќи организмот може да покажува и други знаци дека му е потребна хидратација“, додаваат тие.
Бојата на урината и заморот се меѓу најчестите показатели
Според експертите, еден од наједноставните начини да се провери дали организмот е доволно хидриран е да се следи бојата на урината.
Светложолтата урина најчесто укажува дека организмот има доволно течности. Од друга страна, потемната боја може да биде знак за недоволна хидратација. Дополнителен показател може да биде и поизразениот мирис на урината.
Заморот и намалената концентрација се уште еден чест знак на дехидрација. Човечкиот мозок содржи приближно 75 проценти вода. Затоа, недоволниот внес на течности може директно да влијае врз менталните способности.
Дури и мала дехидрација може да предизвика потешкотии со концентрацијата, побавно размислување и намалена способност за донесување одлуки. Многумина оваа состојба ја опишуваат како „мозочна магла“. Тоа е чувство при кое е тешко да се задржи вниманието и нормално да се извршуваат секојдневните обврски.
Недоволниот внес на течности е една од честите причини за главоболка во текот на летото. Според експертите, намаленото количество вода во организмот може да влијае врз процесите поврзани со чувството на болка.
Ако дехидрацијата продолжи да се влошува, може да дојде до намалување на крвниот притисок. Тоа, пак, може да предизвика вртоглавица, слабост, па дури и губење на свеста.
Доволната хидратација е важна и за менталното здравје
Последните истражувања, според лекарите, покажуваат дека доволната хидрираност има значење не само за физичкото, туку и за менталното здравје.
Луѓето кои внесуваат недоволно течности почесто чувствуваат стрес, напнатост и полошо расположение.
„При потење организмот не губи само вода, туку и важни електролити, меѓу кои и натриумот. Непријатните мускулни грчеви, особено кај постарите лица и по интензивен физички напор, може да бидат уште еден знак за недоволен внес на течности во организмот“, предупредуваат лекарите.
Според нив, повеќето возрасни лица во текот на денот треба да внесуваат меѓу 1,5 и 2 литри течности. Во периоди на високи температури, потребите на организмот може да бидат и поголеми.
„Еден од најдобрите показатели за добра хидрираност останува светлата боја на урината, која најчесто покажува дека организмот добива доволно течности“, советуваат лекарите.