Македонскиот ракометен шампион Еурофарм Пелистер официјално го промовираше своето најново засилување за тековната натпреварувачка сезона. Нов член на битолскиот состав е францускиот ракометар Саду Нтанзи, кој стави потпис на едногодишен договор со раководството на клубот.
Нтанзи игра на позицијата среден бек и има 26 години, а во редовите на битолскиот тим доаѓа директно од германскиот бундеслигаш Мелсунген. Со овој трансфер клубот добива сериозен квалитет во организацијата на нападот пред претстојните домашни и меѓународни предизвици.
Францускиот интернационалец потекнува од реномираната ракометна школа на Пари Сен Жермен, каде што помина четири сезони во сениорскиот тим. За време на својот престој во клубот од Париз, Нтанзи освои четири шампионски титули во Франција, а се закити и со по еден трофеј во националниот Куп и Суперкуп на земјата. Покрај клупските успеси, тој редовно настапуваше за сите младински репрезентативни категории на Франција.
Во својата досегашна кариера, по заминувањето од Пари Сен Жермен, Нтанзи го носеше дресот на Феникс Тулуз, унгарска Татабања и катарскиот состав Ал Араби, пред да се пресели во Бундеслигата како дел од екипата на Мелсунген. Со германскиот тим минатата сезона го освои пехарот во Лигата на Европа и обезбеди пласман во Лигата на шампионите за тековната сезона.