Кирил Ангелов, кој како дете бил жртва на сексуално злоставување, а подоцна успешно се изборил и со канцерот, најави хуманитарен подвиг – пешачење во должина од 111 километри со цел подигнување на свеста за сексуално злоставување на деца, булинг и сите форми на насилство.
Акцијата, како што објави Ангелов, ќе се одржи од 30 март до 4 април 2026 година. Почетната точка ќе биде Скопје, а крајната Демир Капија, со можност рутата да претрпи промени во зависност од условите на терен.
„Молкот на државните структури низ годините ме натера на овој потег. Верувам дека народот може да промени сѐ, ако има желба. Можам ова пешачење да го направам сам, но целта ми е да покажеме дека жртвите не треба да поминуваат сами низ сопствените тегобни патешествија,“ напиша Ангелов.
Тој ги охрабри сите заинтересирани да му се приклучат – било од Скопје, Велес, Неготино или на само еден дел од патот – за да се покаже заедништво и поддршка. „Да ги утешиме жртвите дека треба да побараат помош, да се доверат некому и да го поминат животот во љубов и пријателство, а не сами и во изолација. Болката не треба да е табу, а ни тишина,“ порача тој.
Ангелов, кој денес отворено пишува за сопствените трауми, истакнува дека подвигот е начин да се испрати силна порака оти општеството мора да ја крене свеста и да застане зад најранливите