Министерот за внатрешни работи, Панче Тошковски, најави дека секоја идентификувана злоупотреба на патни трошоци ќе резултира со соодветна правна постапка. Како пример, тој посочи дека Министерството веќе поднело кривична пријава против десет полициски службеници, осомничени дека противзаконски присвоиле средства од државниот буџет.
Во изјава за медиумите по јавната дебата по повод Неделата на пешаците во Идризово, Тошковски беше дециден дека институциите ќе постапуваат доследно, без разлика на позицијата или поврзаноста на сторителите.
„Против десетмина полициски службеници поднесовме кривична пријава за злоупотреба на патни трошоци. Во рамки на постапката постојат докази кои укажуваат, на ниво на основано сомневање, дека тие незаконски наплатувале пари од буџетот, односно од средствата на македонските граѓани. Од тие причини, поднесена е кривична пријава од страна на Одделот за внатрешна контрола, како што тоа го правиме и во сите други случаи кога ќе утврдиме дека одредени лица во редовите на МВР, наместо да ја штитат јавноста, всушност ја оштетуваат. За секој таков случај ќе следи пријава, без разлика на тоа дали за тие лица се зборува дека се блиски со одредени политички или деловни кругови,“ изјави Тошковски.
Осврнувајќи се и на злоупотребите во други институции, тој укажа и на проблемот со исплата на патни трошоци кај пратениците, за кои постојат сомневања дека ги користат иако имаат сопствен имот во Скопје.
„Ги охрабрувам истражувачките новинари да ги проверат и случаите што ги споменувате, каде постои основ за сомневање дека поединци ја злоупотребиле законската регулатива или овластувањата што им ги дава законот. Ве уверувам дека, како и во претходни случаи кога ние самите утврдивме злоупотреби или тие беа откриени преку медиуми, а подоцна доставени до нас, презедовме соодветни постапки. Тоа ќе го правиме и понатаму. Принципот дека законот важи еднакво за сите мора да биде и ќе биде реалност,“ нагласи министерот.
Според Тошковски, идентификуваните случаи на злоупотреба на патни трошоци не се изолирани и претставуваат системски предизвик кој бара транспарентност, одговорност и активна улога на медиумите и институциите.
Извор: Нова Македонија