Нутриционистите предупредуваат на можни проблеми со апсорпцијата на важни витамини и минерали
Кафето е дел од секојдневието на милиони луѓе, но нутриционистите предупредуваат дека омилениот напиток може да влијае врз апсорпцијата на одредени витамини и минерали.
Според експертите, кофеинот и другите состојки во кафето можат да ја намалат ефикасноста на некои додатоци во исхраната, па затоа се препорачува да помине најмалку еден час меѓу пиењето кафе и земањето суплементи.
Иако витамините А, Е, К и Ц не се засегнати од консумирањето кафе, тоа не важи и за сите хранливи материи.
Калциумот, железото и цинкот бараат поголемо внимание
Експертите посочуваат дека кофеинот може благо да ја намали апсорпцијата на калциумот и да придонесе за негово поголемо исфрлање преку урината. Дополнително, може да влијае и врз начинот на кој организмот го користи витаминот Д, кој има важна улога во искористувањето на калциумот.
Железото е уште еден минерал чија апсорпција може значително да се намали. Причината се полифенолите и танините во кафето, кои се врзуваат за железото и му отежнуваат на организмот да го искористи. Поради тоа, нутриционистите советуваат железото да се зема со храна богата со витамин Ц.
Сличен ефект има и кај цинкот. Танините од кафето можат да формираат соединенија кои ја ограничуваат неговата апсорпција, па затоа не се препорачува истовремено консумирање.
Магнезиумот и витамините Б е подобро да се земаат одвоено
Според стручњаците, кафето може да го зголеми излачувањето на витамините од Б групата и магнезиумот преку урината. Иако директно не ја блокира нивната апсорпција, кофеинот може да придонесе тие побрзо да се исфрлат од телото.
Поради тоа, многу нутриционисти препорачуваат магнезиумот да се зема во вечерните часови, додека витамините од Б групата да не се комбинираат со утринското кафе.
За максимален ефект од суплементите, експертите советуваат секогаш да се почитува временска дистанца меѓу нивното земање и консумирањето кафе.