Ново светло во човечкото тело
Научниците откриваат дека човечкото тело може да биде повеќе од сложен биохемиски систем – секоја наша клетка емитува ултраслаба светлина.
Истражувањата покажуваат дека митохондриите, „електранските центри“ на клетката, испуштаат биофотони, микроскопски честички светлина кои можат да имаат значајна улога во преносот на информации. Овој феномен отвора нови можности за разбирање на комуникацијата и функциите на човечкото тело на невидливо ниво.
Митохондриите како извори на светлина
Биофотоните се ултраслаба емисија на фотони во видливиот спектар, која се регистрира само со суперчувствителни детектори. Секој метаболички процес во клетката создава микроскопска светлина, резултат на оксидативните реакции во митохондриите. Со други зборови, секогаш кога телото произведува енергија, тоа истовремено „светнува“ на микроскопско ниво.
Идејата за вакво зрачење не е нова – рускиот биолог Александар Гурвич зборувал за „митогенетско зрачење“, а германскиот биофизичар Фриц-Алберт Поп го потврди и го воведе терминoт во 1970-тите. Денес, сите живи организми, од бактерии до луѓе, се познати како извори на оваа слаба светлина.
Биофотоните и комуникацијата меѓу клетките
Сè повеќе истражувачи веруваат дека биофотоните не се случаен нуспроизвод, туку можат да ја олеснат комуникацијата меѓу клетките. Има докази дека оваа светлина влијае врз соседните клетки, менувајќи ја нивната електрична активност и однесување.
Некои научници ја разгледуваат можноста ваквата светлосна комуникација да постои и во мозокот, меѓу невроните, како дополнителен систем на сигнализација покрај веќе познатите електрични и хемиски сигнали. Иако функцијата на биофотоните сè уште не е целосно разјаснета, откритието ги отвора вратите кон ново разбирање на свеста и сложеноста на човечкото тело.