Транспортната дејност е многу важен сегмент за целата држава, за развојот и јакнењето на економијата и оттаму Владата заедно со вас транспортерите креираме развојни политики со цел подобрување на условите за работа за сите вас. Ги надминуваме турбулентните времиња и со успешни политики успеваме да го зајакнеме партнерскиот однос и заеднички да постигнуваме резултати, истакна министерот Благој Бочварски на традиционалната средба со превозниците, во организација на Асоцијацијата Макам Транс.
Тој во своето излагање ги потенцираше политиките што Министерството за транспорт и врски ги презема во насока на развојот на транспортната дејност и подобрување на условите на превозниците и како што напомена, транспортниот сектор е многу важен сегмент во националната економија.
„Транспортната дејност, а посебно патниот транспорт, е многу важен за развојот и јакнењето на економијата и оттаму ние како Влада креираме развојни политики со цел подобри услови за вас превозниците. Нашите заеднички напори вродија со плод и треба сите ние да сме горди на тоа. Пред нас е членството во Европска Унија, но до тогаш мораме заедно да го изодиме патот, да ги спроведеме потребните реформи и сакам да ве уверам дека поддршката од Владата кон транспортниот сектор несомнено ќе продолжи.“ – изјави министерот Бочварски.
Тој исто така информираше и за напорите кои се прават со цел обезбедување на дополнителни транспортни дозволи со кои се нудат дополнителни можности за македонските транспортни компании.
„Од наредната 2024 година Северна Македонија како полноправна членка на Организацијата за црноморска економска соработка за нашите транспортери добива 5 илјади Б-Сек дозволи, а во однос на ЦЕМТ дозволите на располагање ќе бидат 1.680 годишни и 2.808 месечни дозволи. Она што сакам да го истакнам, а е новост е дека со украинската страна договоривме 700 дозволи за и од трети земји, почнувајќи од 2024 година, а исто така по низа состаноци и средби на мешовитата македонско-германска комисија договорено е значително зголемување на контингентот на дозволи по сите видови на превоз, што сметам дека е голем успех. Дополнително, со Република Србија се согласивме да превозот кој се врши за и од трети земји со еколошки возила, односно возила со категорија „зелено возило“ и повисоките категории, да биде ослободен од режимот на дозволи кога ќе се надминат административните процедури, што сметам дека е една одлична мерка и историски успех за транспортерите.“ – истакна министерот Бочварски.
Министерството за транспорт и врски останува партнер на превозниците во Македонија, продолжуваме да ја спроведуваме транспортната стратегија и да правиме сериозни чекори за обезбедување подобри услови за работа на македонските транспортери и за зајакнување на транспортната дејност.