БУГАРИЈА НЕ ОТСТАПУВА: Уставните измени остануваат услов за Скопје на патот кон ЕУ, вели Жељазков

Бугарскиот премиер Росен Жељазков изјави дека Софија не бара ништо надвор од веќе договорените обврски за започнување на пристапните преговори на Македонија со Европската Унија. Тој повтори дека уставните измени остануваат услов за Скопје.

Жељазков нагласи дека инсистирањето на внесување на Бугарите во Уставот не е нов услов, туку дел од официјалниот европски пакет договорен во 2022 година.

Во гостувањето во емисијата „Недела 150“ на Бугарското национално радио, Жељазков беше прашан дали Бугарија би направила политички гест кон Скопје со повлекување на барањето за уставни измени.

„Не мислам дека воопшто постои таков разговор“, одговори премиерот.

Тој потсети дека меѓу двете земји нема нерешени билатерални прашања, затоа што постои Договор за добрососедство и потпишан протокол, а проблемите што во моментов се отвораат околу протоколот во Скопје ги оцени како дел од „домашна политичка кореографија“, насочена и кон домашната јавност и кон Европскиот совет.

„Бугарија не изразува никаков друг став освен ставот на Европскиот совет – да се вклучат промените во Уставот и да се исполнат сите обврски од протоколот, кои се составен дел од компромисниот предлог од 2022 година“, рече тој.

Жељазков нагласи дека Софија не поставува никакви нови или различни услови од оние што веќе се усвоени од ЕУ. Уставните измени остануваат услов за Скопје да продолжи по европскиот пат.

„Ако властите во Скопје сакаат да бидат дел од ЕУ, тие мора да го следат овој пат, кој е дел од ставот на самата Европска Унија кон Северна Македонија“, истакна бугарскиот премиер.

На прашањето дали е можен дополнителен билатерален протокол меѓу двете земји што би му дал дополнителни гаранции на Скопје, Жељазков одговори дека поголема гаранција од едногласната одлука на бугарското Народно собрание не постои.

„На колегите од Скопје треба да им биде јасно дека стоиме зад овој став затоа што е принципиелен. Нема да менуваме ништо – ниту во поглед на претворањето на процесот во билатерален спор, ниту во барање на невидливи влијанија и интеракции со големите политички играчи низ светот“, додаде премиерот.