Јотова ќе назначи привремена влада – избори на 19 април
Претседателката Илијана Јотова најави дека денеска ќе издаде указ за назначување на привремена влада и за распишување парламентарни избори на 19 април. Одлуката следува откако кандидатот за привремен премиер, Андреј Ѓуров, го претстави составот на техничкиот кабинет.
„Ќе издадам указ за назначување на вашиот привремен кабинет и ќе ја чекам вашата заклетва пред Народното собрание. Исто така, ќе издадам указ за одржување парламентарни избори на 19 април“, изјави Јотова, пренесе БТА.
Осми избори од 2021 година
Со одржувањето на изборите на 19 април, бугарските граѓани по осми пат од 2021 година ќе гласаат на парламентарни избори.
По протестите на крајот од минатата година, владата предводена од премиерот Росен Жељазков поднесе оставка. Претседателот Румен Радев, кој ја извршува функцијата во периодот 2017 – 2026 година, одржа консултации со парламентарните партии.
Неуспешни мандати и законска процедура
На почетокот на годината Радев им додели три мандати за формирање влада на коалициите ГЕРБ – СДФ, Промените продолжуваат – Демократска Бугарија и Алијанса за права и слободи, но сите три беа вратени без формирана влада, со што стана јасно дека ќе следуваат предвремени избори.
На 12 февруари, Јотова го назначи заменик-гувернерот на Бугарската народна банка, Андреј Ѓуров, за вршител на должноста премиер и му ја довери задачата да предложи состав на влада.
Според Законот за Бугарската народна банка, доколку гувернерот или заменик-гувернерот даде изречна согласност да биде именуван за вршител на должноста премиер, поднесува оставка од функцијата.