Светица со голема духовна сила
Света Петка е една од најпочитуваните светици меѓу православните христијани, но и меѓу луѓето од други вери. Таа е позната како заштитничка на жените, сиромашните и болните, и се смета дека поседувала дар на исцелување и пророштво. Нејзината духовна сила, според верувањата, продолжила да делува и по нејзиното упокојување.
Народни верувања и обичаи
На денот на Света Петка, жените традиционално не готват, не перат и не шијат, за да не го навлечат гневот на светицата. Денот е посветен на молитва, мир и духовна чистота. Луѓето со здравствени проблеми се мијат со осветена вода и се молат за исцеление. Девојките, пак, чуваат трошки од славскиот колач за да ја дознаат својата судбина, а во некои села дел од колачот се дели и на добитокот за здравје.
Живот и пат на моштите
Родена во 10 век во градот Епиват, близу Цариград, Света Петка потекнувала од богато и побожно семејство. По смртта на своите родители, го поделила наследството на сиромашните и се замонашила. Поголем дел од животот поминала во пустина, посветена на молитва и пост. Нејзините мошти низ вековите биле пренесувани во повеќе градови – од Цариград, Трново и Белград, до Јаши во Романија, каде се наоѓаат и денес. Кај храмовите посветени на Света Петка често има извори со лековита вода, во кои верниците наоѓаат духовна и телесна утеха.