Буџетот на државата се полни подобро од очекуваното, а реализацијата на приходите и инвестициите покажува стабилна фискална кондиција. Министерката за финансии, Гордана Димитриеска-Кочоска, изјави дека финансиските резултати за април се особено добри. Тие ги надминуваат  резултатите од првите два месеци од годинава.

Поголеми приходи и засилена наплата

Министерката нагласи дека постојат напори за зголемување на присилната наплата и наплата на дивиденди, со цел раст на вкупните даночни приходи. Иако финалните извештаи сè уште се очекуваат, досегашните индикатори укажуваат на позитивен тренд во буџетското извршување.

Капитални инвестиции со реален пристап

До 8 април, институциите реализирале капитални инвестиции во вредност од 73 милиони евра, што претставува 10% од планираното за цела година. Димитриеска-Кочоска објасни дека лошите климатски услови го забавиле темпото на реализација, но најави транспарентен пристап во евиденцијата. Платени аванси и гаранции повеќе нема да се сметаат за завршени проекти, за да се избегне искривена слика за реализираноста.

Мицкоски за субвенциите: Буџетот е како никогаш досега, долговите од минатото се вратени, тековни се исплатите

Царински приливи стабилни, отворени можности во трговијата со САД

Во однос на царините, министерката истакна дека наплатата е стабилна. Таа се осврна и на одлуката на САД да ги стопира зголемените царински стапки за 90 дена, што го отвора патот за директен извоз на македонски производи. Според неа, царините од 10% се прифатливи за најголем број држави и претставуваат економска можност.

Состанок со Светска банка и ММФ во Вашингтон

Следната недела, Димитриеска-Кочоска ќе замине за Вашингтон, каде ќе учествува на пролетните средби на Светска банка и ММФ. Таму ќе ги искористи разговорите со челниците за унапредување на трговската размена и финансиска соработка.

Извор: Курир