Средби со ММФ, Светска банка и инвеститори
Министерката за финансии Гордана Димитриеска-Кочоска од денеска престојува во Вашингтон, каде до 18 април ќе учествува на Пролетните средби на Меѓународниот монетарен фонд и Светска банка.
За време на посетата се планирани повеќе средби со претставници на овие институции, како и со американскиот Трезор и меѓународни инвеститори.
Фокус на економските политики и јавните финансии
Според Министерството за финансии, во фокус на разговорите со претставниците на ММФ ќе бидат фискалната консолидација, економските политики и влијанието на актуелните кризи врз јавните финансии.
Во рамки на агендата се предвидени средби со заменик-генералниот директор на ММФ, Бо Ли, извршниот директор Јерон Клик, како и со директорот на Европскиот оддел Алфред Камер и шефот на Мисијата Ник Гигинеишвили.
Разговори за развојни проекти и институционална соработка
Во Светска банка, министерката ќе разговара со потпретседателката за Европа и Централна Азија, Антонела Басани, како и со претставници на одборот на институцијата. Темите ќе бидат поврзани со спроведувањето на Рамката за партнерство и можностите за реализација на развојни проекти.
Во текот на посетата се предвидени и средби во Трезорот на САД и во Канцеларијата ОТА, каде ќе се дискутира за управувањето со јавните финансии, подобрување на институционалната ефикасност и намалување на ризиците.
На Пролетните средби учествува и гувернерот на Народната банка Трајко Славески, заедно со делегација од Народната банка и Министерството за финансии, во која е и државниот секретар Андриана Матлиоска.
Пролетните средби на ММФ и Светска банка се одржуваат секоја година во април и претставуваат платформа за дискусија за глобалните економски предизвици и можностите за нивно надминување.