Најмалку 10 лица загинаа во новата размена на руски и украински напади со беспилотни летала. Во нападите биле погодени цивилни возила, автобус и железничка станица, а десетици лица се повредени. Според официјалните информации, две жртви се регистрирани во Русија, а осум во Украина.
Руските власти соопштија дека во Брјанската област двајца цивили го загубиле животот, додека уште шест лица биле повредени во украински напади со дронови. Во Суземскиот и Погарскиот реон биле нападнати цивилни возила, а во градот Новозибков биле оштетени неколку автомобили и бензинска пумпа.
Во Украина, руските сили со беспилотни летала нападнале меѓуградски автобус во Херсон. Пет лица биле повредени, меѓу кои и едно малолетно лице, додека уште две лица биле ранети во одделни напади врз градот.
Во Харковската област, две лица загинале, а осум биле повредени при напад со дронови врз железничката станица во Лозова. Украинските железници соопштија дека во нападот биле оштетени станицата, контактната мрежа и неколку железнички вагони.
Уште три лица го загубиле животот, а три се повредени во напад врз општината Вишневе во Днепропетровската област. Локалните власти соопштија дека по ударот избувнале пожари во магацини на логистички компании и во продавница.
Во меѓувреме, украинските власти информираа дека бројот на загинати во претходниот руски напад врз Павлоград се зголемил на три. Во истиот напад биле повредени уште седум лица.