Првпат македонско филмско остварување е номинирано за престижните телевизиски награди
Документарниот филм „Приказната за Силјан“ во режија на Тамара Котевска испиша историја во македонската кинематографија, откако доби две номинации за 78. Emmy Awards. Станува збор за прв македонски филм што е номиниран за овие престижни награди, со што остварувањето добива значајно место и на меѓународната документарна сцена.
Филмот е номиниран во категоријата „Исклучителна вредност во документарното филмско творештво“ (Exceptional Merit in Documentary Filmmaking), една од најценетите категории на Emmy Awards, која ги препознава делата со исклучителна авторска, уметничка и општествена вредност.
Номинација и за кинематографијата
„Приказната за Силјан“ е номинирана и во категоријата „Извонредна кинематографија за неиграна програма“ (Outstanding Cinematography for a Nonfiction Program), признание за визуелниот изглед на филмот и работата на директорот на фотографија Jean Dakar, чија кинематографија ја доловува приказната за човекот, природата и преживувањето.
Со двете номинации, филмот продолжува да го афирмира македонскиот документарен филм на светската сцена, надоврзувајќи се на успешниот фестивалски пат со признание од една од најпрестижните телевизиски академии.
Свеченото доделување на 78. Emmy Awards ќе се одржи на 14 септември во Peacock Theater во Лос Анџелес, додека наградите во креативните категории, Creative Arts Emmy Awards, ќе бидат врачени на 5 и 6 септември.