Александер Зверев стана најдобриот тенисер на светот, но наместо честитки се соочи со прашања дали навистина го заслужува првото место на АТП-листата. Германецот не го крие разочарувањето од критиките што го следат неговиот најголем успех во кариерата. По елиминацијата на Мастерсот во Париз, тој порача дека се чувствува како единствениот светски рекет број еден што мора постојано да дава објаснувања за сопствениот успех.
Зверев го презеде врвот на светската ранг-листа по исклучително успешната сезона во која успеа да ги освои Ролан Гарос и Отвореното првенство на САД, додека на Вимблдон играше во големото финале. Сепак, неговиот прв натпревар во улога на светски број еден заврши со пораз од италијанскиот тенисер Лоренцо Музети во рамките на второто коло во Париз, со резултат 7-6(5) и 6-2.
„Не мислам дека некој морал да се објаснува толку многу како јас во последните неколку дена, што, да бидам искрен, е фрустрирачки. Бев малку изнервиран бидејќи достигнувањето на првото место е нешто за кое сонува секој играч. Но, чувствувам дека сум единствениот светски рекет број еден во историјата на тенисот кој мора да објаснува зошто е во ред што сум на врвот. Мислам дека заслужувам да бидам тука, иако денес загубив“, вели Зверев.
Искачувањето на Германецот на челната позиција предизвика поделени реакции во спортската јавност. Дел од критичарите отворено тврдат дека тој имал корист од отсуството и здравствените проблеми на Јаник Синер и Карлос Алкарас, кои поради повреди пропуштија значаен дел од натпреварувачката сезона.
Иако зад себе има две освоени гренслем-титули, германскиот тенисер бележи значително послаб резултат во директните пресметки со водечките имиња. Во текот на оваа година тој забележал 62 победи и осум порази против тенисери надвор од првите десет на АТП-листата, но успеал да победи на само три од вкупно 12 натпревари против претставници од Топ 10 друштвото.
Статистичките податоци се особено неповолни во дуелите против неговите двајца главни ривали. Зверев се соочува со серија од 10 последователни порази во натпреварите против Синер, додека против Алкарас претрпе пораз во четири од последните пет меѓусебни пресметки.
Германскиот тенисер не бараше оправдување за неуспехот на теренот против Музети, признавајќи пред медиумите дека одиграл еден од своите најслаби дуели во текот на изминатите неколку месеци.
„Да поедноставам, тој играше навистина добро, а јас играв навистина лошо. Мислам дека ова не беше воопшто добар меч за мене, веројатно еден од моите најлоши во последните неколку месеци“, рече Зверев.
Официјалниот трофеј за освојувањето на првото место на светската ранг-листа му беше предаден на Зверев во понеделникот, непосредно пред стартот на неговиот натпреварувачки настап на парискиот Мастерс турнир.