Продажбата на електрични автомобили продолжува да расте
Глобалната продажба на електрични возила би можела дополнително да забрза поради војната во Иран, оценува Меѓународната агенција за енергетика, наведувајќи дека високите цени на нафтата го поттикнуваат преминот кон електрични автомобили.
Агенцијата со седиште во Париз соопшти дека глобалната продажба на електрични возила пораснала за 20 проценти во 2025 година и надминала 20 милиони единици. Тоа значи дека секој четврти нов автомобил продаден во светот минатата година бил електричен.
Кинеските производители учествувале со 60 проценти во глобалната продажба, додека европските и северноамериканските компании имале удел од околу 15 проценти.
Во Германија, која е најголем европски пазар за електрични возила, продажбата скокнала за 50 проценти и достигнала рекордни 850.000 возила.
Ормуската Теснина и ризикот за снабдувањето со нафта
Меѓународната агенција за енергетика очекува продажбата на електрични возила годинава да достигне околу 23 милиони единици, што би претставувало речиси 30 проценти од сите продадени автомобили во светот.
Во извештајот се наведува дека блокадата на Ормуската Теснина, преку која пред војната минувале околу 20 проценти од глобалните залихи на нафта и течен природен гас, може дополнително да ја забрза транзицијата кон електрични возила поради континуирано високите цени на енергенсите.
Агенцијата очекува и националните влади да воведат нови субвенции и стимулации за купување електрични автомобили, со цел да се намали зависноста од увоз на нафта.
МАЕ: Електричните возила носат олеснување во енергетската криза
– „Продажбата на електрични автомобили постави нови рекорди во речиси 100 земји минатата година. Растечката популарност на електричните возила означи голема промена за автомобилските пазари и за енергетскиот систем во целина – и тоа нуди одредено олеснување во моментов, среде најголемиот шок во снабдувањето со нафта во историјата,“ изјави извршниот директор на Меѓународната агенција за енергетика, Фатих Бирол.
Тој додаде дека падот на цените на батериите и можните политички мерки како одговор на глобалната енергетска криза дополнително ќе го поттикнат растот на пазарот на електрични возила.