ФРАНЦИЈА ПРЕДУПРЕДИ НА СТРАНСКО МЕШАЊЕ ВО ИЗБОРИТЕ: Баро го посочи Маск меѓу личностите што влијаат врз демократската дебата во Европа

Францускиот министер за надворешни работи Жан-Ноел Баро предупреди на обиди за влијание врз претседателските избори во Франција следната година. На конференција на Организацијата за економска соработка и развој (ОЕЦД), тој го спомена американскиот милијардер Елон Маск меѓу личностите што влијаат врз демократските дебати во Европа, објавија француските медиуми.

„Непријателите на демократијата прават сè што можат за да нè дестабилизираат“, рече Баро, осврнувајќи се на изборите во 2027 година.

„Тие ги искористуваат поделбите меѓу нас и користат прашања како што се имиграцијата, секуларната природа на државата и израелско-палестинскиот конфликт за да поттикнат омраза и тензии“, додаде тој, посочувајќи дека ваквите дејствија се опширно документирани.

Како примери, Баро наведе израелска компанија што создавала лажни француски профили „за да организира вештачки судири по палестинското прашање“. Тој спомена и „големи кампањи за онлајн вознемирување од страна на Елон Маск против европските лидери, со цел да влијае врз националните дебати користејќи ја неговата социјална мрежа“, чии пораки се шират во голем обем.

Баро предупреди и на „подмолни кампањи што сугерираат дека следните претседателски избори во Франција ќе бидат наместени“.

Францускиот министер го осуди и ширењето, како што рече, „непријателски наративи што доаѓаат од Русија и Кина, како и од Иран и заедницата MAGA“ во врска со студентските протести во Франција. MAGA е движење поврзано со поддржувачите на американскиот претседател Доналд Трамп.

Трамп минатата недела на својата платформа Truth Social напиша: „Она што се случува во Франција не е ништо повеќе од неконтролирана масовна имиграција. Не станува збор за училишта, туку за исламот што сака да ја преземе некогаш големата земја!“

Баро одговори дека Франција ги следи и разобличува ваквите обиди и дека нема да прифати странско мешање.

„Ги гледаме, ги разоткриваме и одговараме на нив со бескомпромисна цврстина. Нема да толерираме никакво странско мешање, без разлика од каде доаѓа. Ова е прашање на суверенитет“, рече францускиот министер.