Грција со штрајкови и протести го одбележува Денот на трудот

Блокиран транспорт и прекини во сообраќајот

Во Грција Денот на трудот се одбележува со штрајкови и протести во Атина и други градови, организирани од синдикатите на вработените во јавниот и приватниот сектор, јавува дописничката на МИА од Атина.

Земјата денеска се соочува со сериозни прекини во сообраќајот. Нема бродски и железнички превоз.

Во Атина, метрото и трамвајот се во 24-часовен штрајк. Автобусите и тролејбусите сообраќаат само во временски интервал од 9 до 21 часот.

Во Солун се пуштени во сообраќај само околу 50 автобуси, што дополнително го ограничува јавниот превоз.

Синдикални протести и барања за права

Двата најголеми грчки синдикати денеска организираат 24-часовен штрајк и протест во Атина. Протестите се најавени како одбележување на борбите на работниците и повик за подобра иднина.

„Да им оддадеме почит на борбите на работниците во минатото и да порачаат дека денешните борби се за подобра иднина“, велат организаторите.

Синдикатите бараат повисоки плати, подобри работнички права и праведен даночен систем. Според нив, целта е подобрување на условите за вработените во јавниот и приватниот сектор.