Игор Стефановски – Иџе оствари одличен резултат на првиот официјален настап со новиот прототип Nova Proto NP01. Македонскиот автомобилист заврши на третото место во генералниот пласман на трката во Илирска Бистрица, во конкуренција на 242 возачи од цела Европа.
Настапот во Словенија беше дел од Европскиот шампионат на ридски патеки, а за Стефановски претставуваше и прво официјално натпреварување со новиот болид. Со Nova Proto NP01, Иџе направи голем чекор кон најмоќната и најпрестижната категорија на ридските трки.
Резултатот добива дополнителна тежина ако се има предвид дека Стефановски се натпреваруваше со целосно нов автомобил, наместо со машина со која има долгогодишно искуство. Воедно, настапот во Илирска Бистрица беше негово деби во новата категорија.
На стартот беа и дел од најпознатите имиња во европскиот ридски автомобилизам, меѓу кои Кевин и Себастиен Пети, Хосеба Ираола Ланзагорта и Петр Трнка. Сите тие настапија со моќни прототипи Nova Proto.
По трката, Иџе ја сподели својата реакција на социјалните мрежи.
„Трето место во генерален пласман во Словенија од 242 автомобилисти од цела Европа, на моето прво деби со новиот прототип. Ова е нешто што дава тежина на целата моја кариера“, напиша Стефановски.
Уште пред почетокот на натпреварувањето беше најавувано дека дебито на Иџе со Nova Proto NP01 ќе биде еден од најинтересните моменти на тркачкиот викенд.
Трката во Илирска Бистрица има значајно место во европскиот автомобилистички календар. Патеката е долга нешто повеќе од пет километри, а годинашното издание е меѓу последните настани во календарот на FIA Европскиот шампионат на ридски патеки за 2026 година.