Сопственикот на Пуцко Петрол бара заменување на ефективниот притвор со куќен, и покрај одбивањето од Кривичниот суд
Асмир Јахоски, сопственик на компанијата Пуцко Петрол, поднел жалба до Апелациониот суд. Жалбата е против одлуката на Кривичниот суд со која му беше одбиена гаранцијата вредна над два милиони евра за замена на ефективниот притвор со куќен притвор. Информацијата ја потврди неговиот адвокат, Владимир Доневски, за Алсат.
„Жалбата беше поднесена утрово, а очекуваме Апелациониот суд да донесе одлука во текот на наредната недела,“ изјави Доневски во краток телефонски разговор.
Од Апелациониот суд за Алсат информираат дека сè уште официјално не ја добиле жалбата. Штом пристигне, ќе постапат по неа. Потоа, ќе побараат мислење од вишото јавно обвинителство. По тоа ќе следува седница на Кривичниот совет. Таму ќе се одлучи дали барањето ќе биде прифатено или одбиено. Одлуката ќе биде донесена на седница, за која јавноста дополнително ќе биде информирана дали ќе биде јавна или затворена за јавноста.
И покрај тоа што Обвинителството за гонење организиран криминал и корупција дало позитивно мислење Јахоски да биде пуштен во куќен притвор доколку на посебна сметка депонира дополнителни 72 милиони денари покрај веќе понудената гаранција од 60 милиони, Кривичниот суд го оцени барањето како неосновано. Според судот, постои ризик осомничениот да влијае врз сведоци или да прикрие докази ако се брани од слобода.
Јахоски е еден од 13-те осомничени во предметот поврзан со сомнителни тендери за набавка на мазут во вредност од 167 милиони евра за ТЕЦ Неготино. Истражната постапка беше отворена во 2023 година. Меѓу осомничените се и познати бизнисмени и поранешни функционери, меѓу кои и ексдиректорот на ЕСМ, Васко Ковачевски, кој е во бегство, и сопственикот на „РКМ Енерџи“, Ратко Капушевски, кој моментално се наоѓа во притвор.
Јахоски се наоѓа во притвор од 12 март 2025 година.
Извор: Алсат М