По нападот со дронови врз Москва утрово, лидерот на Чеченија и еден од главните команданти во руската инвазија врз Украина, Рамзан Кадиров, на „Телеграм“ напиша дека во Русија треба да се прогласи вонредна состојба.

„Сметам дека е неопходно да се прогласи вонредна состојба во Русија и да се употребат сите борбени средства наменети за оваа цел за да се исчисти целата оваа терористичка ќелија одеднаш. Верувам дека треба да се користат термините „украинска армија и украински политичари“, но наместо тоа, само терористи“, напиша Кадиров, според руската државна агенција „РИА Новости“.

Министерството за одбрана на Русија претходно соопшти дека денеска Украина извршила терористички напад со дронови врз објекти во Москва.

Во соопштението на руското Министерство се наведува дека нападот бил извршен со осум беспилотни летала, од кои пет биле соборени од артилерискиот систем за противвоздушна одбрана во московскиот регион, додека три беспилотни летала биле неутрализирани по електронски пат и пренасочени од патеката кон програмираните цели.